ШИНЭХЭН PMP®-Д БАЯР ХҮРГЭЕ!
PMI Mongolia Chapter-ийн эрхэм гишүүн Ганхуягийн Тэмүүлэнд дэлхий нийтэд хүлээн зөвшөөрөгдсөн Project Management Professional (PMP®) зэрэг хүртсэнд чин сэтгэлийн халуун баяр хүргэе.
Г.Тэмүүлэн нь өдгөө ХААН Банкны Үйл ажиллагааны шинэчлэлийн газарт Бүтээгдэхүүний удирдагч (Product Lead)-аар ажиллаж байна. Тэрээр Олон улсын харилцааны бакалавр, Бизнесийн удирдлагын магистр (MBA) зэрэгтэй бөгөөд 2022 онд тус газарт Процесс сайжруулалтын мэргэжилтнээр ажиллаж эхэлж, Lean Six Sigma аргачлалд тулгуурласан процесс сайжруулах төсөл, санаачилгууд дээр ажилласан туршлагатай.
Сүүлийн гурван жилийн хугацаанд тэрээр банкны арын албаны процессын дахин инженерчлэлд төвлөрөн ажиллаж, Процесс дахин инженерчлэлийн Agile Release Train-д Ахлах Бүтээгдэхүүн Хариуцагч (Senior Product Owner)-аар ажилласан. Энэ хугацаанд олон чиг үүргийн газар, хэлтэс, баг болон оролцогч талуудтай хамтран процессыг хялбарчлах, оновчлох, гүйцэтгэл болон хүлээлгийн хугацааг бууруулах, үйл ажиллагааны үр ашгийг нэмэгдүүлэхэд хувь нэмрээ оруулжээ.
Түүнчлэн гар ажиллагаа болон Excel-д суурилсан процесс, ажлын урсгалыг автоматжуулах замаар давтагддаг ажлыг багасгах, хүний хүчин зүйлээс шалтгаалах алдааг бууруулах, илүү тасралтгүй, үр ашигтай процесс бий болгох чиглэлээр ажилласан нь түүний процессын шинэчлэл, технологи, Agile арга барилыг практикт хослуулан хэрэгжүүлсэн туршлагыг улам баяжуулжээ.
Тэмүүлэн нь PMP® зэргээс гадна Lean Six Sigma Green Belt (LSSGB) болон UiPath Automation Business Analyst Associate (ABAA) сертификатуудыг эзэмшдэг. Тэрээр цаашид төслийн удирдлага, процессын дахин инженерчлэл, автоматжуулалт, Agile аргачлал болон дижитал шилжилтийн чиглэлээр мэдлэг, туршлагаа улам хөгжүүлэхээр зорин ажиллаж байна.
PMP® зэрэг хүртсэнээр Тэмүүлэн процесс сайжруулалт, автоматжуулалтын практик туршлагаа төслийн удирдлагын олон улсын арга барилтай илүү нягт уялдуулах боломжоо өргөжүүлж байна. Энэ нь олон чиг үүргийн баг, оролцогч талуудыг нэг зорилгын дор уялдуулах, өөрчлөлтийн санаачилгуудыг илүү системтэй удирдах, улмаар байгууллагад хэмжигдэхүйц үнэ цэн бий болгох чадавхыг нь улам бэхжүүлж буй чухал алхам юм.
PMI Mongolia Chapter-ийн хамт олон Ганхуягийн Тэмүүлэнгийн энэхүү амжилтыг бахархан хуваалцахын ялдамд цаашдын мэргэжлийн замналд нь улам их өсөлт, шинэ боломж, амжилт бүтээлийг хүсэж байна. PMP® зэрэг хүртсэн энэхүү амжилт нь түүнд шинэ сорилт, боломжуудын үүдийг нээж, төслийн удирдлага, процессын шинэчлэл, автоматжуулалт болон дижитал шилжилтийн чиглэлээр байгууллага, салбартаа улам их үнэ цэн бүтээхэд нь түлхэц болно гэдэгт итгэлтэй байна.